1Jo 1 | PWG | STEP | God dobu iyamoyamoni na namada wawaya sago imakamakai, tuna na God Vonana ma yawasa karena. Ma tokai gamona kavi yanei, matakiiyai kakitai ma kavotovotovoni,

1 John 1

Yesu na God Vonana ma yawasa everevereta.

1 God dobu iyamoyamoni na namada wawaya sago imakamakai, tuna na God Vonana ma yawasa karena. Ma tokai gamona kavi yanei, matakiiyai kakitai ma kavotovotovoni, ^a 2 na tuna kaimamatarei tami kurimi. Yawasa Vaghata Wawayina irudeba na kakitai. Ma kawamatarai kavonavonemi da yawasa makamakii nonowina na Mamai God gwabinai ipisi ma inekiibau kurita. ^b 3 Aviyavisina kavi yanei ma kakitai na peyarina kaisisiyei kurimi, iyamna akii kayowana da tami ma tokai na yavata tinuwasago. Ma bade Mamai God ma Natuna Yesu Keriso ^{▼▼1:3 Keriso:Grik damsi gamosi evonavona bo ‘Keriso’ ma Hibru damsi gamosi evonavona bo ‘Mesaya.’ Ivi ruwa iyamna ‘God ina Vivinevine Wawayina.’} yavata tinuwasago. 4 Kagirugiruma kurimi da akii nuwabiibai ina rakata kamokamowa.

God na yasegana.

5 Keriso gwabinai sisiya kavi yanei na kurimi kaidebei na weni. God tuna na yasegana. Ma didibara berasi gwabinai kegha. 6 Mikeda tavonavona da God yavata tinuwasago ma didibara berasi patana da taberaberai na tibero ma vonavaghata yawasina ke kata vovotani. 7 God tuna yasegana kamonai emakamakai ma tota bade nakanani taberai. Yasegana yawasina kamonai tababa na turaturata yavata tinuwasago ma ita bera beroberosi kudubina Natuna Yesu taranai ina kowakowatawei.

8 Ma kata vona da bera beroberosi ke kata beraberai na tibero. Nakanani kati sisiya na vonavaghata gwabitiyai kegha, tota mani tiberoberowe meyeta. 9 Ma kawamatarai ita bera beroberosi timamatarei na God kudubina ina kowatawei ma ina terevimaninita, iyamna tuna na ke viviberona ma ina bera maninisi kavakava. Tuna kubiine ina vonakiiyapa bagibagina iterei kurita na ina berai. 10 Ma kata vona da bera beroberosi ke meyani kata beraberai na tavonavona da God tuna viviberona ma vonana ita yawasa kamona ke ita makamakai.